چیرۆک

منداڵه‌کان و گه‌وره‌کان 

وه‌رگێڕ: مه‌نیژه‌ میرموکری

ته‌ته‌ر هه‌واڵی هێنابۆوه‌ که‌ باوکیان له‌ خاکی ئیتالیا په‌کی‌که‌وتووه‌. شتێکی نامۆ، نوێ، بێگانه‌ که‌ هیچ بۆ تێگه‌یشتن نەدەبوو له‌ به‌رامبه‌رییاندا قووت‌ببۆوه‌. به‌رز و پان له‌وێ ڕاوه‌ستابوو. نه‌ ڕوخسار، نه‌ چاو و نه‌ ده‌می هه‌بوو. خه‌ڵکی‌ هیچ شوێن و مڵکی هیچ شتێ نه‌بوو. نه‌ هی ئه‌و ژیانه‌ پڕ له‌ هه‌ڵا و هه‌نگامه‌یه‌ی به‌ر ده‌رکی کلیسا‌ و نه‌ هی شه‌قام. نه‌ هی ئه‌و تاریکییه‌ گه‌رمه‌ی شه‌وه‌ دووره‌کان و نه‌ هی چیرۆکه‌کان.

تسالی

وەرگێڕانی لە ئینگلیزییەوە: محەممەدئەمین مەجیدیان

ئەم چەرۆکییانە کاریان بەسەر سپی پێستەکانەوە نەبوو. ئەو کاتەی کە رێبوارێک پێی وتن کە سەرۆکەکەیان لەگەڵ سپی پێستەکان کاغەزی واژوو کردوە، چەروکییەکان پێی پێکەنین. بەڵام کاتێک زانیان سەرۆکەکەیان زەمینەکانیانی داوە بە سپییەکان، بێدەنگ بوون.

سووپەڕمەن

 

 رزگار لوتفی

تا خۆی ددانی پێدا نەنا کە هەشت مانگ لەمەوبەر و لە رۆژێکی باراناویدا دڵی لە لێدان کەوتووە و دەستبەجێ مردووە هەرگیز بە خەیاڵمدا نەهاتووە رۆژێ لە رۆژان ئەژمارم کردبێ کە باوکم، ئەو کەسەی چل ساڵی تەواو تاقە کۆڵەکە و تەنها پشتیوانم بووە، هەشت مانگ بێ مردبێ و لە کۆڕی گەرمی بنەماڵەکەماندا نەمابێت.

دووعاکەی پوورە ئایشێ

 

رەسووڵ سوڵتانی

فایلەکەی لەبن پیلی نا و بەڕێ کەوت. لەمێژ بوو دڵی ئەوەندە خۆش نەببوو. لەوەتەی لە شاخ هاتبوونە خوارێ، رۆژێک نانی هەبوو دۆی نەبوو، رۆژێک دۆی هەبوو و نانی نەبوو. هەرشوکرانەبژێریش بوو. دەیگوت خودا بەشی منی وا داوە. شوکرانەبژێرم. دەیگوت: ئاه و دوعای دایکم گرتوومی. 

ساڵی مار

فەڕۆخ نێعمەتپوور

من دەبێ پیشانی بدەم کە مارەکان سەرەڕای سەرنەکەوتنیان ئەرکیان شۆڕش کردنە و ئەمە لە سەریان تۆمارکراوە و ئیدی ناتوانن خۆی لێدەرباز کەن. لە کاتێکدا بیر لەوە دەکەمەوە کە چلۆن وشە و رستەکانم لە سەر یەک هەڵبچنم و دایانبڕێژم، بیر لە قۆزی و جوان چاکی خۆم و هاوڕێ ماراوییەکانیشم دەکەمەوە و، بەزەییم بەو پشیلانەدا دێتەوە کە بە هۆی ئەقڵ فراوانیان هەمیشە شوێنێکیان هەیە بۆ لێکەوتنە خوارەوە.

 

براکلی و تەختی خەوەکەی

وەرگێڕانی لە ئینگلیزییەوە: محەممەدئەمین مەجیدیان

"جێت هەیە بۆ خواردن؟" هەر بەدەم ئەم پرسیارەوە چوو بە لای دٶڵابەکەو ئەو خواردەمەنییە پاشەکەوتخراوانەی هێنایە دەر کە بۆ رۆژانی زستان هەڵیگرتبوون. براکلی هەر وەکوو هۆشی لێبڕا بێ، راوەستا بوو سەیری ئەکرد، کە تینا نیسک و برینجەکەی خستە سەر چاوەی گازەکە.

 کچێکی سەرگەردان 

وەرگێڕانی لە ئینگلیزییەوە: محەممەدئەمین مەجیدیان 

بە فیزێکەوە سەیری کردم و بە کەشوفشێکەوە لە دەرگا چووە دەر و منی لە بار و  دۆخێکی رق و سووکایەتی پێکراویدا بەجێهێشت. لە نێو جانتاکەما دەستم کوتا بۆ جلەکانی خەوم، بەئارامی لەبەرم کردن، چراکەم کوژاندەوە و لە نیو جێگەدا ئەو هەستە ئاشنایەی کە پێی دەڵێن دەردی دووری یان دڵتەنگی بۆ نیشتمان و خزم و کەس دایگرتم. بەدەم گریانەوە خەو بردمیەوە.

نیوە چڵ

                                                                                                                                                                                                                 

 رەسوڵ سووڵتانی

ئێستاش كە مێردەكەم وا پۆستەكەی بەرزە، هەر ئاگای لە من نییە. مانگێ جارێك لەگەڵ سكرتێرەكەی‌دا سەفەری خاریج دەكا. سكرتێرەكەی كچۆڵەیەكی هەژدە ساڵانەیە، كە دێتەوەش دیسان خۆی بە كاروبارانەوە سەرقاڵ دەكا و بە منیش دەڵێ، لە چیت كەمە؟ چیت دەوێ بۆتی دەكەم و بڕۆ چیت پێ خۆشە بیكڕە. مێردەكەم پێی وایە هەموو شتێك هەر زێڕ و جلوبەرگە بۆ ژن. 

  

شاری باوێشکەکان

رزگار لوتفی

قەتارەی لێوی تا دواسنوورەکانی هەڵدەپچڕێ و باوێشکێک دەدات. جەماوەرەکەش بۆی دەستێننەوە. منیش. ناگەم باوێشکێکی دیکە بدەم نەخۆشێکی تر نۆبەبڕی‌ دەکا و ددانە نیوداشەکانی دەخاتە روو و باوێشکێکی دوورودرێژ دەدا. جەماوەر و منیش بەدوویدا. لەم ‌ئان و ساتە ناوم دەخوێندرێتەوە. بە دەم باوێشکدانەوە روو لە دەرگای ژووری دوکتورەکە دەکەم. لە رووی دەرگاکە نووسراوە.

 

سێوە گڕاوییەکان

 

فەڕۆخ نێعمەتپوور

ئیستا من شتێکم لە نێوان بیر و ئارەزووەکانمدا. ئارەزووەکان منیان برد و بیر منی هێنایەوە بۆ ئێرە، بە بێ ئەوەی شتێک گۆڕابێ. ئەوانەی رقم لێیان بوو هەر لێرە ماون و ئەوانەی خۆشم دەویستن هەر لەوێ،... ئێستا برینێکی ئارەزوەکانم بە روومەتەوەیە و، برینێکی بیر بە سەر دڵمەوە. نە لەوێ خۆش بووم و دەمتوانی بژیم و نە لێرە، نە لەوێ دەمتوانی پەرە بە ئارەزووەکانم بدەم و نە لێرە دەتوانم پەرە بە بیرم. شوێنێکی تریش لەم دونیایەدا بۆ ژیان شک نابەم. هەڵبەت گەر شوێنێکی وا هەبێ.

بوومە خۆراکی قرشەکان

کاروان محەمەد فەتاح

دوای نەشتەرگەرییەکەی، بەردەوام ئاوی ڕەش لە چاوانی دێنە دەرێ و بەکارهێنانی قەترەکان ناتوانن ڕێگری لە هاتنەدەرەوەی ئاوەکە بکەن. ڕۆژانە دایکی لە دووکانەکەی نزیکی ماڵیان کیلۆیەک گێزەری بۆ دەکڕێت، ئەم لە جیاتی ئەوەی بیانخوات، قاچەکانی پێ دەخورێنێت. جەستەی تووشی هەستیارییەکەی زۆر بووە و بە قسەی خۆی بۆ کەمکردنەوەی ئازارەکەی پێویستە بەردەوام بیخورێنێت. 

 

فاتمۆکێ

فەڕۆخ نێعمەتپوور

 شەوانە تا بەیانی دەنگی وەڕە وەڕی سەگان تەواو نابێ. فاتمۆکێ ئەگەرچی یەکجار ماندووە، بەڵام هەندێ جار خەوی لێناکەوێ. وەک بڵێی کەسێک لە پشت سەرینەکەیەوە دانیشتووە و پێی دەڵێ جار جارە خەیاڵکردنی نیوەشەوان پێویستە. خەیاڵەکانی فاتمۆکێ دەڕۆن. دەڕۆن و دەڕۆن تا وەک دەنگی سەگان لە شوێنێک لە ناو تاریکاییەکاندا ون دەبن

 

سیانزە بەرد

رزگار لوتفی

نازانم چ رازێکە، کاتێک گرتە ویدیۆییەکە دەگاتە ئەم بەشەی خۆی، دڵەڕاوکێ کۆنەکە دەمگرێتەوە و لەوە دەترسم نەکا دیسانەوە کارەبا ببڕێت‌و، هورووژمی تاریکی رامـماڵێتەوە سەر وەختی جەڵتە ناوەختەکەی باوکم‌و ناشتنە باراناوییە پاییزییەکەی پارێکە ئەم‌ وەختانە!

سێ کورتیلە چیرۆک

رزگار لوتفی

وامدەزانی رابوردوو فەرامۆش دەکرێ و دەتوانرێ لە یاد ببردرێتەوە؛ بەڵام ئێستا دەزانم و بڕواشم هێناوە رابوردوو بە چنگەکڕێش بێ رێگای خۆی لە ئێستاو داهاتووشدا دەکاتەوە و بەهەر لەونێک بووە لە قۆناغێکدا بوونی متافیزیای خۆی دەسەپێنێت. 

 

شەوانى هاوین و ئەستێرە ونبووەکان

گۆران رەئوف

ئەستێرەکان وەک جارانى شەوانى هاوین نەماون، دەڵێیى لە ماوەى ئەو ساڵانەدا ئەگەرچى ساڵانێکى زۆر نییە، دەردى ونبونى ئەستێرەکان پەیدابووە، یان دەڵێى دەستێک هەیە ئارام ئارام ئەستێرەکان بە ئاسمانەوە دەچنێ.