شرۆڤە

بۆچی دەنووسین (١٨)

فەڕۆخ نێعمەتپوور

دەنووسین لەبەر ئەوەی بە هۆی ژیانەوە و بەهۆی دووری و تێپەڕینەکانەوە لێواولێوی نۆستالۆژیاین. نووسین فڕین بە ناو مەوداکان و بە ناو لێڵییەکاندایە. دووبارە ژیاندنەوەی رابردووە. هەستکردنەوە بەو کاتانەیە وا ژیاین و بەڵام دیسانەوە دەمانەوێ هەستیان پێبکەینەوە و بەجۆرێک تیایانا بژینەوە؛ رەنگە لەبەر ئەوەی کاتی خۆی جوان هەستمان پێنەکردن.

بۆچی دەنووسین (١٩)

فەڕۆخ نێعمەتپوور

 مەرج نیە کاراکتێری دەق کاری گەورە ئەنجام بدات و دەق گێڕانەوەی ئەم کارە گەورەیە بێت. کاراکتێری دەق لە رێگای ئەو کاریگەرییەوە لە زەینی خوێنەردا جێیدێڵێ، دەبێ بە قارەمان. چونکە خەسڵەتێک لە کاراکتێرەکەدا بەرجەستەیە و ئێمە ئەم بەرجەستەبوونە لە رێگای خوێندنەوەوە ئەزمووندەکەین.

بۆچی دەنووسین (٢٠)

فەڕۆخ نێعمەتپوور

لە رێگای نووسینەوە ئێمە جۆری کارتێکەرییەکانی ژینگە لە سەر مرۆڤ و مرۆڤ لەسەر ژینگە دەنوێنینەوە. رەنگە بە نیشاندانی وێرانیی ژینگە دەتوانین نیشانی بدەین کە مرۆڤ سەرەڕای سەرکەوتنە رواڵەتیەکانی چەندە لە راستیدا بۆخۆیشی وێران بووە. شەڕەکان راستەوخۆترینی ئەو رووداوانەن وا پێکەوە هەم وێرانی سروشت نیشاندەدەن و هەم وێرانیی مرۆڤ.

بۆچی دەنووسین (٢١)

فەڕۆخ نێعمەتپوور

ئێمە دەنووسین چونکە نووسین ئاوردانەوەیە لە لوکاڵ و پێناسەکردنەوەیەتی لە رەوتێکی بێکۆتاییدا. هەروەها نووسین تێپەڕاندنی لوکاڵ و بەلوکاڵ کردنی جیهانەکانی تری دەرەوەی لوکاڵە. بەم پێیە نووسین بەلوکاڵ کردنی هەموو جیهانە، جا چ لە ناو جیهانی فیزیکیدا و چ لە ناو جیهانی دەروونیدا.

بۆچی دەنووسین (٢٢)

فەڕۆخ نێعمەتپوور

ئێمە دەنووسین لەبەر ئەوەی پیشانی بدەین جیهانی دەرەوەی ئێمە دەکرێ زۆر لەوەی هەیە جۆراوجۆرتر و فرەچەشنتر بێت. نووسین ئازادکردنی تەمومژی رۆحی ئێمەیە بە تەمای دۆزینەوەی جیهانەکانی تر لە گەمەیەکی هەستیارانە و ئپیسمتۆلۆژیدا.

بۆچی دەنووسین (٢٣)

فەڕۆخ نێعمەتپوور

بە بێ بیرەوەری نووسین لەدایکنابێ. بیرەوەری منداڵدانی نووسینە. بەڵام خودی بیرەوەریش بە تەنیا بریتی نیە و ناتوانی بریتی بێت لە دەقیكی ئەدەبی. بیرەوەری تەنیا ماددەیەکی خاو و کاڵە بەدەستمانەوە. دەبێ کاری لەسەر بکرێ. دەبێ پیایا بگەڕێین و گوڵبژێری بکەین و وەهایان لەپاڵ یەکتردا دابنێین بتوانین مانای دەق ئاسای لێ دەربهێنین.

بۆچی دەنووسین (٢٤)

فەڕۆخ نێعمەتپوور

ئێمە دەنووسین لەبەر ئەوەی نووسین چێکردنی خۆشی، جوانی و چێژە. نووسین خوڵقاندنی خەون و زیادکردنییەتی بە جیهانی واقع،... رێگای بەرەو ئازادی و بەختەوەرییە. دەنووسین لەبەر ئەوەی مرۆڤ لە راستیدا بوونەوەری مەوداکانی نێوان خەون و راستییە. نە ئەمە و نە ئەو، بەڵکو ئاوێتەیەکە لە هەردووکیان.

بۆچی دەنووسین (٢٥)

فەڕۆخ نێعمەتپوور

دەق بە تاککردنی چەمکی گشتیی ئازادییە. فرەچەشن کردن و فرەروخسارکردنیەتی. دەنووسین لەبەر ئەوەی بڵێین ئازادی ئەوەندە بڕیاردەرە گەر نەتوانین وەڵامی داواکانی بدەینەوە ئەوا رەنگە بەیانییەک لە خەوهەستین و دەبینین بووین بە قالۆنچەیەکی زەلام.

بۆچی دەنووسین (٢٦)

فەڕۆخ نێعمەتپوور

دەنووسین لەبەر ئەوەی لە رێگای دەقەوە لە بونیاتە سەرەکییەکانی ژیان واتە فاتالیسم، ئانومی و حاڵەتە نێوانەکەی ئەم دووانە بگەین. هەر گێڕانەوەیەک سەرلەنوێ پێداچوونەوەیە بەم پرسیارە ئەزەلییە. ژیان وەهایشە کە ژیانی هەر مرۆڤێکی تایبەت دەتوانێ لە رێگای گێرانەوەوە تیشکێکی نوێ و تایبەت بخاتە سەر ئەم پرسیارە. نووسین مەلەی نێوان ئەم سێ دووڕگەیەیە.