شێعر و پەخشان

کتێبى نەرم و نیانی

 سەباح ڕەنجدەر

 

ئەگەر هەنگاوێک هەڵێنین

هیوایەک بۆ شارى خاڵی و خەواڵوو دێتەدی

دەرگاى ماڵ هەر بە بۆن و چاو پێدا خشانەوەیان دەکرێنەوە

 

کتێبى نەرم و نیانی

 

 سەباح ڕەنجدەر

 

چیا سینگى چل حۆرییە و زەماوەند ڕادەگرین

تەرمى نوێژ بۆ نەکراوى مەسیحى بچکۆلە

بە ئاوێنە و مۆمى داگیرساوەوە لەبەر خۆر دادەنێین

تیشک لە ناوى پشوو دەدا و خۆى تێدا بەهێز دەکات

وزە دەداتە باڵى باڵندە و درەخت و گژوگیا

وزەى باڵى باڵندە

تفەنگ و ئەسپى سواران دەلاوێنێتەوە

باڵندەیەک دەنووکى لە تەڕایى درەخت و گژوگیا نا

باڵى بەسەریاندا شۆڕ کردەوە و تێنەپەڕى

هەر بەسەریاندا سووڕایەوە و بڕواى بە هەموو شتێکى کردن

کەس لەناو نوێندا نەماوە

کێڵگە و باخ چاوەڕوانن جۆگەلەکان بکرێنەوە

تەرمەکانمان چاویان لە کێڵگە و باخ داڕێژراون

شاعیرانى شەرم لە فرمێسک کردوو

لە چاوەڕوانیى بەروبوومیدا دوا بەشى کتێبى نەرم و نیانی دەخوێننەوە

ژیان بێزار و بێدار ناکەن

وەرن ئاوێنەى سەر ڕووى بەردى سڕ و خوداوەندى گۆزەى باڵندە بە دەمەوە وەرن

تا خوێن لە گورچیلەى منداڵە ڕوومەت داچۆڕاوەکانمان نەبووەتە دڵۆپەى شووم

ڕەوڕەوەى ڕەنگ تێکچوویان ڕەنگاوڕەنگ بکەینەوە و بیکەینە هیوا

ماچیش لە دەمیان بخۆینەوە

ببینین کە لە چیا دێنە خوارەوە

گەرد بە پێیانەوە نییە و بە گۆرانییەکانیان بریندارمان دەکەن

خەونى خۆشم پێیانەوە بینیوە

ئەگەر هەنگاوێک هەڵێنین

هیوایەک بۆ شارى خاڵی و خەواڵوو دێتەدی

دەرگاى ماڵ هەر بە بۆن و چاو پێدا خشانەوەیان دەکرێنەوە

چیا کە سینگى چل حۆریت

ماڵ دەزانێت باسى جۆلانە و جەژنى خۆى بکات

پارچە گۆشتێکى گەرم و بە شەکر و شیر داپۆشراوە

لە تۆدا دەبێتە دڵ و ژیانى ئەو دەژى

بە ناوى تۆوە لە ئاو و ئاسۆ دەپەڕێتەوە و ئاماژەی زەمین سوور هەڵدەگەیمان دەداتێ

دەمەوێ وێنەى درەختێکى نەرم و نیان بۆ باڵندە بکێشم

درەخت خۆى بە باڵندە مەست دەکات

منیش باڵندەى دەمى گۆزە دەهێنمە سەرشانم و دێمە ناو چیا

چرایەکم هەیە دایدەگیرسێنم