شێعر و پەخشان

مەسیحى دووەم ئاگرى بۆ شاعیران لە خوداوەند دزى

سەباح رەنجدەر

دەنگێک بەو ناوەدا تێپەڕى بیستم
کەس لەناو نوێندا نەماوە
کێڵگە و باخ چاوەڕوانن جۆگەلەکان بکرێنەوە

 

 

 مەسیحى دووەم ئاگرى بۆ شاعیران لە خوداوەند دزى

 

            سەباح رەنجدەر

 

چیا سینگى چل پەرییە و زەماوەند ڕادەگرین

تەرمى نوێژ بۆ نەکراوى مەسیحى دووەم

بە ئاوێنە و مۆمى داگیرساوەوە لە شاڕێى شارى ئەفسووناوى دادەنێین

تیشک لە ناوى پشوو دەدا و خۆى تێدا بەهێز دەکات

دەست لەسەر شانى گۆڕهەڵکەن لادەدا و وزە دەداتە باڵى باڵندە و درەخت و گژوگیا

وزەى باڵى باڵندە

تفەنگ و ئەسپى سواران دەلاوێنێتەوە

باڵندەیێکى ڕەوانبێژ دەنووکى لە تەڕایى درەخت و گژوگیا نا

باڵى بەسەریاندا شۆڕ کردەوە و تێنەپەڕى

هەر بەسەریاندا سووڕایەوە و بڕواى بە هەموو شتێکى کردن 

لە هاواریان گوێچکە ماسییەکى هەڵدایەوە ناو ڕووبار 

دەنگێک بەو ناوەدا تێپەڕى بیستم

کەس لەناو نوێندا نەماوە

کێڵگە و باخ چاوەڕوانن جۆگەلەکان بکرێنەوە

تەرمەکانمان چاویان لە کێڵگە و باخ داڕێژراون

شاعیرانى شەرم لە فرمێسک کردوو

لە چاوەڕوانیى بەروبوومیدا دوا بەشى کتێبى نەرم و نیانی شار و شانازییانە

لەمەوبەدوا دەچنە ناو خاوبوونەى ڕک و ژیان بێزار و بێدار ناکەن

حەزدەکەن لە کاتى نووسین و نووستندا پەنجەرەکان کراوەبن

وەرن ئاوێنەى سەر ڕووى بەردى سڕ و خوداوەندى گۆزەى باڵندە بە دەمەوە

لە چاوى ماتى گوڵەبەڕۆژە ورد ببنەوە

تا خوێن لە گورچیلەى منداڵە ڕوومەت داچۆڕاوەکانمان

نەبووەتە دڵۆپەى شووم و بەدەم ترسەوە نەنوون

لەیلوک و ڕەوڕەوەى ڕەنگ تێکچوویان بنەخشێنینەوە و ڕەنگ

لە ئەستێرەى سەرخۆشى بەرەبەیان بخوازین

ماچیش لە دەمیان بخۆینەوە

ببینین کە لە چیا دێنە خوارەوە

گەرد بە پێیانەوە نییە و بە گۆرانییەکانیان بریندارمان دەکەن

خەونم پێیانەوە بینیوە ڕووناکى لە سیماى دەدان

ئەگەر هەنگاوێک بە سووکى بەناو ڕووناکى سیمایان هەڵێنین

هیوایەک بۆ شارى خاڵی و خەواڵوو دێتەدی

دەرگاى ماڵ بەماتى دڵ و چاو پێداخشانەوەیان دەکرێنەوە

کڵاوڕۆژنە پێش خۆیان هەناسەیان دەباتە ژوورەوە

لەسەر کەل و پەل و سینى و پیاڵە و فەخفوورى دەنیشێ 

چیا کە سینگى چل پەریت

ماڵ دەزانێت باسى جۆلانە و جەژنى خۆى بکات

پارچە گۆشتێکى گەرم و بە شەکر و شیر داپۆشراوە

لە تۆدا دەبێتە دڵ و ژیانى ئەو دەژى

بە ناوى تۆوە لە ئاو و ئاسۆ دەپەڕێتەوە و ئاماژەی زەمین سوور هەڵدەگەڕێمان دەداتێ

دەمەوێ وێنەى درەختێکى نەرم و نیان بۆ باڵندە بکێشم

دوو دەستى کراوە بەسەریەوە بێت

درەخت خۆى بە باڵندە مەست دەکات و دەمار و خوێنى فڕین دەڕژێتە دەموچاوى

منیش باڵندەى دەمى گۆزە دەهێنمە سەرشانم و دێمە ناو چیا

چرایەک تانوپۆمە و چاوى پاکدەکەمەوە

لەمەوبەدوا باڵندە بەرپێمان ئاوڕشێن دەکات و تەپوتۆز دەکوژێ

بەردێک لەو بەردانە هەڵدەگرێتەوە بۆ کوشتنى هەڵماندا

دەیکەینە ڕوخسارى پەیکەرمان

باڵندە لە خوانى خوداى خوارد و چەکى هەڵگرت

 

 

 Related image