هەواڵی هونەری

دڵزاری شاعیر پێی نایە ١٠٢ ساڵی تەمەن

دابین کامەڕان کەریم شارەزا

ماوەتەوە بڵێین ئەو عیشقەی لەنێوان دڵزار و کتێب هێشتا خاپوور نەبوە و تا ئێستاش ئەویندارانە سەرقاڵی خوێندنەوەیە ،لەشساغی و تەندروست چاکی بۆ دڵزاری مەزن تکا دەکەین و هیوادارین ئەو مۆمە درەوشاوەیە لەنێو ئەدەبی کوردیدا بمێنێ.

 

دڵزاری شاعیر پێی نایە ١٠٢ ساڵی تەمەن

دابین کامەڕان کەریم شارەزا 

 

دڵزاری شاعیر سەد و یەک ساڵی تەمەنی تەواودەکا و لێرە بەدواوە پێدەنێتە تەمەنی سەد و دوو ساڵییەوە.

 

(دان بەوە دادەنێم کە ژیاوم)

زۆرن ئەو کەسانەی بە قەڵەم و بەخەبات خزمەتی گەورەیان بە کوردستان گەیاندوە (دڵزار) شاعیرو  سیاسی و ئەدیبێکی دڵسۆز و چالاک لە خزمەتکردنی هەم وێژە و هەم خەباتی سیاسی کوردستاندا بووە 

 

دڵزار نازناوی شیعری  ئەحمەد مستەفا ئاغا محمد ئاغای حەوێزیە لە ئێوارەی ٨ی کانونی دووەم ی ساڵی ١٩٢٠ لە ئێوارەیەکی سارد و بەفراوی لە شاری کۆیە چاوی بەدونیا هەڵهێناوە برای شاعیرانی کۆچکردوو کەریم شارەزا و خوشکە فریشتە یە .لە ناو خێزانێکی شعر دۆست و خوێندەواردا پەروەردە بووە و لە ساڵی ١٩٤٠ یەکەم  شعری بڵاوکردۆتەوە،هەر لەو کاتەوە نازناوی دڵزار ی بۆخۆی هەڵبژاردووە.

 

مامۆستا دڵزاری شاعیر و تێکۆشەری گەورەی کورد ژیانێک ژیاوە لێوان لێو لەخەبات و تێکۆشان لەپێناو ئازادی و سەربەستی تاک و کۆمەڵگا .

 

بەدرێژایی هەشتا ساڵی رابردوو، هەلومەرج‌و دۆخی بەرجەستەی میللەتەكەمان، چۆن گوزەرابێ‌‌و سەنگەری راستەقینەی شیعر چی خواستبێ‌، دڵزار، كەمتەرخەمی نەكردووە.. هەروەك چۆن، لەقۆناغی گەتجێتی خۆیدا، بەراورد بەقۆناغ‌و سەردەمەكە، هەنگاوێكی مێژوویی بوو لەراپەڕاندنی ئەركی ئەدەبی سەرەڕای جیاوازییەكانی فكرو ئایدۆلۆژیا،

 

مامۆستا دڵزار بەئەرك‌و ئاكاریی شاعیرێکی راستگۆ، بەكێشەی نەتەوەیی، سیاسەتی نێونەتەوەیی، سیاسەتی ناوچەیی، دەربەست بەچۆنیەتی بنیاتنانی دیموكراسی‌و كۆمەڵی مەدەنی‌و پێشكەوتن، دەربەست بەبنەماكانی ئابوریی‌و بەدیهێنانی مافە پیشەییەكان، گەشەپێدانی پەیوەندی كۆمەڵایەتی، مافی تاك‌و كۆی كۆمەڵگا، هەموو ئەو پرسە نیشتمانییانەی پەیوەندییان بەچارەنووسی نەتەوەكەمانەوە هەبووە‌و لەسەرەنجامیشدا، هەر كاتێك پێویست بووبێ‌، دڵزار روانگەی رەخنەگرانە بووەو رەخنەی بونیادنەرانەشی گرتووە

 

ئەوینداری بۆ کوردستان و گوند و شاخ و دۆڵە جوانەکانی، ئەوینداری بۆ جوانی ئافرەت و کلتووری خۆشەویستی کوردەواری لە هۆنراوەکانی ڕەنگیان داوەتەوە. 

 ماوەتەوە بڵێین ئەو عیشقەی لەنێوان دڵزار و کتێب هێشتا خاپوور نەبوە و تا ئێستاش ئەویندارانە سەرقاڵی خوێندنەوەیە ،لەشساغی و تەندروست چاکی بۆ دڵزاری مەزن تکا دەکەین و هیوادارین ئەو مۆمە درەوشاوەیە لەنێو ئەدەبی کوردیدا بمێنێ.

 

٩ ی کانونی دووەمی ٢٠٢١