شێعر و پەخشان

ماسکەکەت فڕێدە ئەی شۆخ

ناڵە حەسەن

ئەی شۆخ

لە نێو کیشوەری باراندا

پێویستیت بە ماسک نیە

لێرە پێویستیت بە پەنجەرە نیە بۆ ڕوانین

لێرە هەموو شتەکان ڕووتن وەکو ئاو

 

ماسکەکەت فڕێدە ئەی شۆخ

                                                                                                                                                                                             

ناڵە حەسەن

 

ماسکەکەت فڕێدە ئەی شۆخ  

با ڕووناکی چاوەکانت

تێکەڵ بە شەوەکانی عومرم بێ

با خۆرەتاوی خەمەکانت

بڕژێتە نێو خۆرئاوابوونەکانی خەیاڵم

با جوانیەکانی ڕوخسارت

تێکەڵ بە سروشتی هەناسەم بێت

با شەونمی سەر پەڕەی لێوەکانت

نیشتیمانی نێو خەونەکانم تەڕ بکات

 

ماسکەکەت فڕێدە ئەی شۆخ

من دەمەوێ حەقیقەتی ڕوخسارت ببینم

ڕووت ڕووت وەکو با

ڕووت ڕووت وەکو بەفر

ڕووت ڕووت وەکو ئاو

هەر بەم باڵا ڕووتە ڕێواسییەوە

لەنێو منداڵدانی عەشقەوە

وەرە نێو ماڵە ڕەنگینەکەی شیعر

هەر بەم ئەدگارە ڕووتە ئاتەشیەوە

لە نێو منداڵدانی شیعرەوە

وەرە نێو ماڵە ڕەنگینەکەی ژیان

ماسکەکەت فڕێدە ئەی شۆخ

وەک کچە کۆچەریەکانی نێو نیشتیمانی خەون

سادە و ساکار

لە نێو گەرمیانی ئارەزوومەوە

وەرە نێو کوێستانی ڕۆحم

لە نێو پەرستگەکانی دڵی من

ڕووت ڕووت بەرەوە /

ڕووت ڕووت وەکو عەشق

ڕووت ڕووت وەکو شیعر

ڕووت ڕووت وەکو ژیان

 

چیت لێبشارمەوە ئەی شۆخ ..؟!

من ماڵم لە هیچ شوێنێک نەبوو

هیچ شوێنێک ماڵی منی لێ نەبوو

نیشتیمانی من لە هیچ کیشوەرێک نەبوو

هیچ کیشوەرێک نیشتیمانی منی لێ نەبوو

 

ئێستا /

من نیشتیمانم بە کۆڵ خۆم داداوە

لە نێو کیشوەرەکانی باران

لە ژێر ڕەشماڵێکی ڕەش ڕەش

ڕەش ڕەش وەکو بەفر

لەنێو خەیاڵێکی سپی سپی

سپی سپی وەکو سێبەر

لە چاوەڕوانیت دام

لێرە / سروشت و خواو

هەموو زیندەوەرەکان

لە چاوەڕوانیت دان

تۆش ماسکەکەت فڕێدە و وەرە ..!

 کە هاتی

ئەو دەفتەرەی

یادەوەریەکانی خۆمم تیا نووسیبوو

لەگەڵ خۆت دا بۆم بهێنە

بیرت نەچێت

تۆش هەموو شتێکم بۆ بنووسە

ئەو ڕۆژەی کە گوتت

من لە پەنجەرەکانی مردنەوە دەڕوانم

یان کە گوتت

من لەنێو مردنەوە خەون دەبینم

یان کە گوتت

ژیان تەنها ئەو وەرزانەی خۆش بوو

کە عاشق بووم

 

تکایە ئەی شۆخ

هەموو شتێکم بۆ بنووسە ، هەموو شتێک

باسی ئەو

 شەوە سوور سوورە سەوداسەریەشم بۆ بکە

کە مەست مەست

 باسی مردن و ماسکت بۆ دەکردم

مەست مەست وەکو مۆم

لە نێو میلۆدیەکانی مردن دەتوایەوە

مەست مەست

باسی وەرزە وەنەوشەییەکانی کچێنی خۆتت

بۆم دەکرد

مەست مەست باسی ئەو ئێوارە ئەرخەوانیەی

کە لە ژیان یاخی بوویت

خۆتدایە دەست گەردەلوولی مەملەکەتی مردن

 

ئەی شۆخ

من لەنێو نیشتیمانی باران

لە ژێر ڕەشماڵێکی ڕەش

ڕەش ڕەش

وەک بەیانیە کازێوەییەکانی عەشق

لەنێو خەیاڵێکی شین

شین شین

وەک ئێوارە لێو بە خەندەکانی شیعر

لە چاوەڕوانیت دام

تۆش / تەنها ماسکەکەت فڕێدە و وەرە

ئەی شۆخ

 بیرت نەچێت / بەر لەوەی بێیت

باسی هەڵوەرینی ئەو گەڵایانەم بۆ بکە

کە لە وەرزە بێ مەیلەکان دەتۆرێن

 باسی ئەو شەقامانەم بۆ بکە

کە چیتر دڵیان بە پیاسەی عاشقەکان ناکرێتەوە

باسی ئەو ڕووبارانەم بۆ بکە

کە لە شەوە خامۆشەکاندا گۆرانی بۆ هەور ناڵێن

باسی بێهوودەیی عەشقم بۆ بکە لە نێو مردنی ژیاندا

باسی ڕەشبوونی سێوەکانم بۆ بکە

لە نێو عەبەسیەتی سەوزایی درەختەکاندا

باسی تەڵخبوونی ئاوێنەکانم بۆ بکە

لە سەردەمی خۆکوشتنی کات دا

باسی بە خۆڵەمێشبوونی کتێبە پیرۆزەکانم بۆ بکە

لە نێو خەیاڵی سەربازێکی تێکشکاوی سەردەمی جەنگەکاندا

 

ئەی شۆخ بیرت نەچێت

باسی ڕووتبوونەوەی بەهارم بۆ بکە

لە نێو خەیاڵی پاییزدا

باسی ڕووتبوونەوەی پەپوولەم بۆ بکە

لە نێو خەیاڵی گوڵە سپیەکان دا

باسی ڕووتبوونەوەی خۆرەتاوم بۆ بکە

لەنێو خەیاڵی کازیوەدا

باسی ڕووتبوونەوەی ئەستێرەکانم بۆ بکە

لە نێو خەیاڵی ئاسمان دا

باسی ڕووتبوونەوەی تریفەم بۆ بکە

لە نێو خەیاڵی تاڤگەکاندا

باسی ڕووتبوونەوەی خاکم بۆ بکە

لە نێو خەیاڵی نیشتیماندا

 

ئەی شۆخ

کە هاتی /

من لە نێو دڵۆپە بارانێک

ڕووت ڕووت

لەژێر ڕەشماڵێکی پەمەییدا

ڕووت ڕووت

لە نێو خەیاڵێکی نازنجی دا

لە چاوەڕوانیت دام

کە هاتی / بیرت نە چێت

هەموو شتێکم بۆ باس بکە ، هەموو شتێک

تۆش /  دە بەڕێکەوە دەی 

تەنها / ماسکەکەت فڕێدە و وەرە 

 

ئەی شۆخ

لە نێو کیشوەری باراندا

پێویستیت بە ماسک نیە

لێرە پێویستیت بە پەنجەرە نیە بۆ ڕوانین

لێرە هەموو شتەکان ڕووتن وەکو ئاو

لێرە هەموو شتەکان دەبریسکێنەوە

وەک تراویلکە هەنارییەکانی ئێواران

لێرە نیشتیمانمان وەک بەرماڵێک

لەژێر ڕەشماڵێک ڕاخستووە

نوێژە عەشقی لەسەر دەکەین

لێرە هەموو زیندەوەرەکان عاشقن

لێرە ژیان بە مانای عەشق

لێرە عەشقیش بە مانای ژیان

ئەی شۆخ من لێرانە

لەژێر ڕەشماڵێکی سوور سوور

لە سەر بەرماڵەکەی نیشتیمان

لە چاوەڕوانیت دام

لێرە سروشت و خوا و

هەموو زیندەوەرەکان / لە چاوەڕوانیت دان

تۆش تەنها ماسکەکەت فڕێدە و وەرە...!