شێعر و پەخشان

دووکەڵ

 

رەسول  سەفەریانی

پەنجەرەکەی بەرەو باشور/ قەت ناوێرم بیکەمەوە

دوکەڵێکی  تۆخی رەشی چڵکنی کۆن / بە هەیکەلی ئینسانێکی ترسناکەوە

راوەستاوە و هەوڵیش ئەدات بێتە ژوورۆ

 

 

ژورەکەی من چوار پەنجەرە لە چوارلاوە دەوری داوە

پەنجەرەکان رەنگاورەنگن

سەوزەکەیان ئەڕوانێ بۆ کوێستانێک و تا چاو دەڕوات

دارە و بەرد و سەوزایی و ژیین

بەرەو باکور پەنجەرەکەم رەنگی سورە

سورێکی وەک رەنگی خوێن و پەڕەی گوڵ و لێوی ئاڵ و سوری ئاڵای دراوسێکەم

لە پەنجەرە زەردەکەوە

هەموو رۆژێ ئەڕوانمە

زەردەی خۆر و پێکەنینی قەتیسکراو

 لەسەر لێوی گەڵاکانی دارە خۆرهەڵاتییەکان

پەنجەرەکەی بەرەو باشور

قەت ناوێرم بیکەمەوە

دوکەڵێکی  تۆخی رەشی چڵکنی کۆن

بە هەیکەلی ئینسانێکی ترسناکەوە

راوەستاوە و هەوڵیش ئەدات بێتە ژوورۆ

ئەم دووکەڵە خنکێنەرە تاکو ئێستا چەن جاریتر هەوڵیداوە

بخزێتە نێو ژوورەکەم و

ژین و ژوور و ژیواری من دووکەڵی کات

یەکەم جاری لە حەڕاوە هەڵیکرد و

ئەمجارە شیان لە چاڵە نەوتەکانی سەعودییەوە 

بە هەیکەلی ئەتاتورک و عەرەبێکی عەبا رەش و شمشێر بە دەس خۆ دەنوێنێت