شێعر و پەخشان

هەڵمی ژیان

رەسوڵ سەفەریانی

په‌نجه‌ی ساردی چاوه‌ڕوانی

له‌سه‌ر تاری چڵه‌کانم

هه‌وای مه‌رگم ئه‌ژه‌نێت و

کوندی خه‌میش

 له‌سه‌ر دوایین قه‌ڵای چۆڵی هیوامه‌وه

گۆرانی بۆ مردن ئه‌ڵێت.

 

هه‌ڵمی ژیان

 

هه‌نگی خه‌یاڵم

بۆ گوڵی هیوایه‌ک ده‌گه‌ڕێ و

باخی ژیانم وه‌رزی زستانی له‌سه‌ره‌

چرپه‌ی چرۆی یه‌ک چڵیشم نایته‌ گوێ

وشکه‌داری ره‌گ سوتاوی ساباتێکم

په‌نجه‌ی ساردی چاوه‌ڕوانی

له‌سه‌ر تاری چڵه‌کانم

هه‌وای مه‌رگم ئه‌ژه‌نێت و

کوندی خه‌میش

 له‌سه‌ر دوایین قه‌ڵای چۆڵی هیوامه‌وه

گۆرانی بۆ مردن ئه‌ڵێت.

چنگی خه‌یاڵ

خۆڵه‌مێشی هیواکانم بۆ لێک ئه‌دات

ژیله‌موویه‌ک په‌نجه‌کانی ده‌گه‌زێت و

بروسکه‌یه‌ک

وه‌کو تاڵێ قژی سپی له‌خه‌رمانێ زوڵفی ره‌شدا

ده‌ئاڵێته‌ باڵای شه‌وی ناهومێدیم

شنه‌ی یادی تروسکانی دو ئه‌ستێره‌

شاری مردوی شه‌و داگرتوی ئاواته‌کان پڕ ده‌کات و

ده‌بنه‌ خۆڵ و

ده‌بنه‌ باران

تۆوی هیوام له‌ باخه‌ڵیان سەوز ئەبێت و

هه‌ڵمی ژیان له‌رووباری ده‌مارمدا

زوقمی مردن ئه‌تاوێنێ

 Bilderesultat for livet kunst